Жаңылыктар

Кыргыз-Түрк «Манас» университети студентке багытталган башкаруу принциптерин жана билим алууда мүмкүнчүлүктөрдүн теңдигин камсыз кылуу саясатынын алкагында MANAS-ÖSYS 2026 кабыл алуу өнөктүгүндө дагы бир маанилүү чечимди ишке ашырды. Кабыл алуу процессинде жаралган муктаждыктарды эске алуу менен кабыл алынган кошумча чечимдин негизинде белгиленген мөөнөттө документтерин тапшыра албай калган көптөгөн абитуриенттерге кайрадан тапшыруу мүмкүнчүлүгү түзүлдү.

Бир күндүк кошумча мөөнөт абитуриенттер үчүн чоң мүмкүнчүлүк болду

Университеттин Студенттерди тандоо жана жайгаштыруу башкармалыгы тарабынан жалпы республикалык тесттин (ЖРТ) жыйынтыктары алдын ала белгиленген календарлык мөөнөттөн кеч жарыялангандыктан, документтерди тапшыруу жол-жобосун өз убагында бүтүрө албай калган абитуриенттер үчүн кабыл алуу системасы 2026-жылдын 3-июлунда кайрадан жеткиликтүү болду.

Берилген кошумча мүмкүнчүлүктүн аркасында ар кандай себептер менен кабыл алуу процессине катыша албай калган көптөгөн ийгиликтүү абитуриенттер MANAS-ÖSYS 2026 боюнча документтерин толуктап, жогорку билим алуу жолун улантууга мүмкүнчүлүк алышты.

Ушул мүмкүнчүлүктөн пайдаланып документтерин ийгиликтүү тапшырган абитуриенттердин бири Элеонора Атамбекова университеттин ректору, профессор Алпаслан Жейланга жооугуп, ага ыраазычылыгын билдирди.

Кыргызстанда гана эмес, ошондой эле Америка Кошмо Штаттарында да билим алуу тажрыйбасы бар Атамбекова документтерди тапшыруу мөөнөтүнүн узартылышы өзү үчүн гана эмес, ушундай эле кырдаалда калган көптөгөн абитуриенттер үчүн дагы өтө маанилүү мүмкүнчүлүк болгонун белгиледи. Анын айтымында, университеттин абитуриенттердин кайрылууларына кылдат жана жоопкерчиликтүү мамиле жасаганы окууга кабыл алына электе эле өзүндө «Манас» университетине болгон күчтүү таандыктык сезимин жараткан. Ал көрсөтүлгөн түшүнүү жана колдоо үчүн ректор, профессор Алпаслан Жейланга терең ыраазычылык билдирди.

Профессор Алпаслан Жейлан: «Ийгиликтүү жаштардын алдындагы тоскоолдуктарды жоюуну маанилүү деп эсептейбиз»

Жолугушууда сөз сүйлөгөн ректор, профессор Алпаслан Жейлан ар кандай себептерден улам кабыл алуу жол-жобосун белгиленген мөөнөттө бүтүрө албай калган көптөгөн абитуриенттерден кайрылуулар түшкөнүн билдирди. Ал билим алууда мүмкүнчүлүктөрдүн теңдигин камсыз кылуу максатында кабыл алуу системасы кошумча бир күнгө кайрадан ачылганын белгиледи.

Профессор Жейлан Кыргыз-Түрк «Манас» университети академиялык мыктылыкты студентке багытталган башкаруу маданияты менен айкалыштырып өнүктүрүп келе жаткан эл аралык жогорку окуу жай экенин белгилеп, төмөнкүлөрдү айтты:

«Биз ийгиликтүү жаштардын жөн гана административдик себептерден улам билим алуу мүмкүнчүлүгүн колдон чыгарып жиберишин каалабайбыз. Университет катары негизги максатыбыз — жогорку академиялык потенциалга ээ жаштардын өздөрү татыктуу болгон мүмкүнчүлүктөргө жетүүсүнө шарт түзүү. Ушул түшүнүк менен кабыл алынган чечимибиздин абитуриенттер тарабынан оң кабыл алынышы бизди кубандырат».

Ректор университеттин академиялык өнүгүүсүнө да токтолуп, акыркы мезгилде ачылган жасалма интеллект жана киберкоопсуздук билим берүү программалары санариптик доор талап кылган жаңы адистик багыттарына багытталган стратегиялык инвестиция экенин айтты. Анын белгилешинче, бул программалар аркылуу студенттерди эл аралык деңгээлде атаандаша ала турган билимге, көндүмдөргө жана кесиптик компетенцияларга ээ адис катары даярдоо көздөлүүдө. Профессор Жейлан ийгиликтүү жаштарды Кыргыз-Түрк «Манас» университетинин чоң үй-бүлөсүнүн катарында көрүүгө ар дайым кубанычта болорун билдирди.

Кыргыз-Түрк «Манас» университети билим берүүдө мүмкүнчүлүктөрдүн теңдигин негизги принцип катары карманган мамилеси, сапаттуу академиялык программалары жана эл аралык көз карашы аркылуу Кыргызстандын таланттуу жаштарына дүйнөлүк деңгээлдеги жогорку билим алуу мүмкүнчүлүгүн сунуштоону улантууда.