Жаңылыктар

Кыргыз-Түрк «Манас» университетинде 2026-жылдын 5-июлунда өтө турган MANAS-ӨSYS 2026 сынагынын алдында бардык даярдык иштери толугу менен аяктады. Сынакты өткөрүүгө катыша турган университеттин профессордук-окутуучулук курамы жана административдик кызматкерлери онлайн форматта өткөн маалыматтык жыйында сынакты өткөрүү тартиби, коопсуздук чаралары жана кызматтык милдеттери боюнча кеңири маалымат алышты.

Быйыл MANAS-ÖSYS сынагына 17 миң 322 абитуриент арыз тапшырды. Сынак эртең мененки жана түштөн кийинки болуп эки нөөмөттө өткөрүлөт. Эртең мененки негизги сынак 16 имаратта, ал эми чет тил сынагы 9 имаратта уюштурулат.

Ректор, профессор Алпаслан Жейлан: «Бардык абитуриенттерге ийгилик каалайм»

Ректор, профессор Алпаслан Жейлан сынактын коопсуз, тартиптүү жана талаптарга ылайык өткөрүлүшүнө салым кошо турган профессордук-окутуучулук курамга жана административдик кызматкерлерге ыраазычылык билдирди.

Профессор Алпаслан Жейлан MANAS-ÖSYS жөн гана студенттерди тандоо сынагы эмес, университеттин билим берүү багытын жаңы студенттер менен байланыштырган маанилүү кадам экенин белгиледи. Ал сынакка катыша турган бардык абитуриенттерге ийгилик каалап, «Манас» үй-бүлөсүнө кошула турган студенттер эл аралык стандарттарга жооп берген сапаттуу жогорку билим алуу мүмкүнчүлүгүнө ээ болушарын айтты.

Сынак өткөрүү процесси кеңири талкууланды

MANAS-ÖSYS комиссиясынын төрагасы, профессор Эржан Челик жыйында сынакты уюштуруунун бардык этаптары боюнча кеңири баяндама жасады.

Профессор Эржан Челик сынактын бардык этаптары талапка ылайык жана бирдиктүү тартипте өткөрүлүшү үчүн кызматкерлердин жоопкерчиликтерин дагы бир жолу эске салды. Жыйында ошондой эле сынак аудиторияларынын жайгашуусу, имарат жана аудитория боюнча жооптуу кызматкерлердин милдеттери, абитуриенттердин сынак өтүүчү имараттарга кирүү жана чыгуу тартиби, өздүгүн тастыктоочу документтерди текшерүү, аудиториядагы каттоо, сынак материалдарын өткөрүп берүү тартиби жана сынактын коопсуздугун камсыздоого байланыштуу бардык иштер боюнча маалымат берилди.

Профессор Эржан Челик MANAS-ÖSYS 2026 сынагын коопсуз, ачык-айкын жана талаптагыдай деңгээлде өткөрүү үчүн бардык даярдыктар аяктаганын белгилеп, уюштуруу иштеринин ийгилиги профессордук-окутуучулук курамдын жана административдик кызматкерлердин өз ара координациясына, жоопкерчилигине жана кылдаттыгына түздөн-түз байланыштуу экенин билдирди.

Маалыматтык жыйын кызматкерлер тарабынан берилген суроолорго жооп берүү менен жыйынтыкталды.