Жаңылыктар

Кыргыз-Түрк Манас университетинин Коммуникация факультетинин Журналистика бөлүмүнүн студенти Алина Маматова ЮНЕСКО тарабынан быйыл сегизинчи жолу уюштурулган “Youth Eyes on the Silk Roads” аттуу эл аралык сүрөт сынагында 2-орунга ээ болду. Сынакка 100 өлкөдөн 7 миңден ашуун сүрөт келип түшкөн. Алина 18-25 жаш категориясында 2-орунга ээ болду. Маматова  кыргыз элинин салттуу ат оюндарынын бири “Кыз куумайды”  чагылдырган сүрөтү менен сыйлыкка татыктуу деп табылды.

Маматова эмгегин Коммуникация факультетинин окутуучусу жана сүрөтчү Фахри Тархандын жетекчилиги астында даярдаган. Ал бул эмгеги аркылуу кыргыз элинин маданий мурасын эл аралык көрүүчүлөргө таанытты. Сынактын жыйынтыгы 2026-жылдын 21-сентябрында Кытайдын борбору Пекин шаарында, Эл аралык тынчтык күнүнө карата уюштурулган XIII Peace Garden Тынчтык фестивалынын алкагында жарыяланды. Элчилердин, ЮНЕСКО өкүлдөрүнүн жана ар кайсы тармактын конокторунун башын бириктирген иш-чара онлайн түрүндө да көрүүчүлөргө көрсөтүлдү.

Кыргызстандын жандуу мурасы сүрөт өнөрү аркылуу чагылдырылды
ЮНЕСКОнун "Жибек жолу" программасынын алкагында уюштурулган быйылкы сынактын темасы "Жибек жолундагы жандуу мурас" деп аталды. Сынак жаштарды тарыхый Жибек жолу боюнда муундан муунга өтүп келе жаткан салттарды, үрп-адаттарды, билимдерди жана маданий көрүнүштөрдү өздөрүнүн көз карашы менен сүрөткө тартууга чакырды.
Маматованын "Кыз куумай" деп аталган эмгеги Кыргызстандагы ат минүү чеберчилиги менен маданий салтты айкалыштырган оюнга арналган. ЮНЕСКОнун бул эмгекке берген баасында белгиленгендей, кыз-жигиттин ортосундагы мамилелерге жана үй-бүлө куруу салттарына байланыштуу болгон бул оюн чабандестердин чеберчилигин гана сыноо  эмес, ошол эле учурда аялдардын көз карандысыздыгынын жана эркиндигинин чагылдырылышы катары да каралат.

Ушуга байланыштуу, бул сүрөт кыргыз маданиятынан бир мисал катары сынактын "жандуу мурас" темасын ачып берип, маданий мурас күнүмдүк турмушта, оюндарда жана коомдук мамилелерде кандайча сакталып, жашап келе жатканын көрсөтөт.

100 өлкөдөн 7000ден ашык эмгек
2026-жылдын 8-апрелинен 28-июлуна чейин өткөрүлгөн сынакка 100 өлкөдөн 7000ден ашык сүрөт келип түшкөн. Катышуучулар эки курактык категорияда (14–17 жана 18–25 жаш) бааланып, ар бир категорияда алдыңкы үч орун жана эки ардактуу сыйлык ыйгарылган.
Өз тармагындагы таанымал адистерден турган Эл аралык тандоо комиссиясы сынакка келген иштерди оригиналдуулугу, өзгөчөлүгү жана визуалдык таасирдүүлүгү боюнча баалаган. Баалоо процессинде теманы уникалдуу жана жаңыча чагылдырган визуалдык баяндамаларга өзгөчө басым жасалган.
ЮНЕСКОнун колдоосу астында уюштурулган бул сынак, кеңири эл аралык катышуусу жана кесипкөй калыстар тобунун баалоосу менен жаш фотографтар үчүн абройлуу эл аралык аянтчага айланган. Бул аянтчада алдыңкы орунга ээ болуу — сүрөт ишинин өзүнүн баяндоо күчү жана оригиналдуу ыкмасы менен ар кайсы өлкөлөрдөн келген иштердин арасынан тандалып алынганын билдирет.

Студенттик иштердин эл аралык деңгээлде таанылуусуна салым кошуу
Маматованын ийгилиги КТМУ үчүн студенттер өздөрүнүн кесиптик билимдерин жана чыгармачыл көндүмдөрүн кантип эл аралык баалоого чыгара ала тургандыгынын айкын үлгүсү болуп саналат. Журналистика билиминин визуалдык баяндоо жана маданий документтештирүү аспектилерин айкалыштырган бул долбоор академиялык жетекчилик менен колдоого алынган студенттик иштер эл аралык деңгээлде резонанс жаратаарын көрсөтүп турат.
Бул сыйлык Коммуникация факультетинин студенттик долбоорлорунун көрүнүктүүлүгүн жогорулатса да, ошондой эле Кыргызстандын маданий мурастарын жайылтуу үчүн да маанилүү. Маматованын ар кандай аймактардагы көрүүчүлөргө жергиликтүү маданий практиканы сунуштоосу маданияттар аралык байланышты өнүктүрүүдө фотографиянын күчүн баса белгилейт.

Ректор Жейлан: «Биз студенттерибиздин алган билимдерин практикада колдонуусун колдойбуз»
КТМУнун ректору, профессор Алпаслан Жейлан Коммуникация факультетинин Журналистика бөлүмүнүн студенти Алина Маматованы жана анын жетекчиси Фахри Тарханды куттуктады. Ал Кыргызстандын жандуу маданий мурасын өзгөчө көз караш менен чагылдырган эмгеги ЮНЕСКОнун эл аралык сынагында сыйлыкка татыктуу деп табылганына кубанычта экенин билдирди. Студенттердин алган билимдерин практикада иш жүзүнө ашыруусуна, өздөрү жашаган коомдун маданиятын түшүнүүсүнө жана эмгектерин эл аралык аянтчаларда көрсөтүүсүнө өзгөчө маани берилерин баса белгилеген ректор Жейлан, бул ийгилик ар кандай тармактагы студенттерди өздөрүнүн долбоорлорун иштеп чыгууга жана таланттарын көрсөтүүгө шыктандырат деген үмүтүн билдирди.

Сынактын жыйынтыгын көрүү үчүн төмөнкү шилтемени басыңыз:

https://unescosilkroadphotocontest.org/en/winners-2026