«Жашыл журналистика: айлана-чөйрөгө багытталган журналистиканын күчү» аттуу семинар өткөрүлдү
“Жашыл журналистика: айлана-чөйрөгө багытталган журналистиканын күчү” аталышындагы семинар Кыргыз–Түрк “Манас” университетинин коммуникация факультетинин журналистика бөлүмү тарабынан уюштурулду. Иш-чарада айлана-чөйрөгө байланышкан маселелерди маалымат каражаттары аркылуу коомчулукка так, этикалык жана илимий негизде жеткирүүнүн мааниси талкууланып, экологиялык журналистиканын заманбап медиадагы орду кеңири каралды.
Семинардын жүрүшүндө климаттык кризис, экологиялык булгануу, жаратылыш ресурстарын коргоо жана туруктуу өнүгүү сыяктуу негизги темалардын журналистикада чагылдырылышы талданды. Айрыкча экологиялык темаларда илимий маалыматтарга таянуу, жоопкерчиликтүү тилди колдонуу жана коомдук кызыкчылыкты сактоо маселелерине өзгөчө көңүл бурулду.
Иш-чара коммуникация факультетинин студенттеринин активдүү катышуусу менен өтүп, суроо-жооп жана талкуу форматында улантылды. Семинар студенттердин экологиялык журналистика боюнча түшүнүгүн тереңдетип, кесиптик көз карашын өнүктүрүүгө олуттуу салым кошту.
